Nu penseru..a Oppitu

Votandumi pe ‘rretu cercu i me radici

Chi sunnu ancora a Oppitu terra di mei amici

Passando a cotraranza a ‘mmenzu a ji vineji

Mi staiu rendendo cuntu  ca j anni furu beij

Bastava  nenti i nenti  oppure nu morzu  i lignu

Facivimu u gattuzzu pe ji sirati i giugnu

Jocavamu  spenzarati a manna o a ‘mmucciateia

Stando finu a tardu  nda n’angulu i vinejia

Scurusi eranu i ‘mberni,  joculani i primaveri

A cosa chiù ‘mportanti ……..non c’eranu penzeri

Nci furu puru l’anni  di passiati i chiazza

Cercando u sguardu timitu i ll’ occhi  i na ragazza

Spessu ndi trovavumu pe fari sirinati

Tuttu finiva a musica a satizzi e supprizzati

Tu fusti assai importanti ndall’ anni  chi passaru

Ma tandu non capisciva….. eru assai cotraru

Pensandoci ben beni cangiasti  nu pocu forma

Ma sempre a stessa immagini nda me menti torna

Eri comu na guida e pedi d’Asprumunti

U circondariu tuttu cu tia faciva i cunti

Pretura  cu Spitali  e Curia Vescovili

su certu signi forti i  paisi assai civili

Riloggiu e madonnina si guardanu a distanza

Quasi a voleri diri “non mancatindi i crianza”

Spissu si senti diri “u paisi è bbandunatu”

Forzi non è veru è u tempu che è mutatu

Mutatu a jiri  avanti  cu nu pedi modernu

Paragonatu a ieri oji pari  ‘mpernu

Sicuru non è cosi  o meghjjiu non d’accorgimu

Simu  condizionati du beni chi ti volimu

Stu beni  ndi porta a  vidiri  trubula l’acqua pura

Tu si sempre chiju, non cangi a to natura.

Oppitu resti tu, paisi riccu i caluri

Puru se i mali tempi ti dezzeru sventuri

                                         Nino Greco